Granadako Meskita Nagusia

Granadako lorategi gutxik eskaintzen dute Meskita Nagusiak San Nikolas plazatik, Albaicinen bertan, oparitzen duen bezalako ikuspegia: oinetan, Darro ibaiaren harana; parean, Alhambrak koroatzen duen Sabika mendia, eta atzealdean, Sierra Nevadako gailurrak. Pinu, olibondo, granadondo, laranjondo eta limoiondoen artean, eta Andaluziako zapore betea duten mosaikozko bi iturriren ondoan, bisitariak hiria lasai begiesteko atseden-leku bat aurkituko du hemen.

Eraikinak, 2003an inauguratuak, balio sinboliko berezia ere badu: 1492az geroztik Granadan eraikitako lehen meskita da, bost mendeko etenaldiaren ondoren. Multzoa hiru zati oso desberdinetan antolatuta dago: lorategia, otoitz-gela eta Ikasketa Islamikoen Zentroa.

Otoitz-gelak apaingarri soila du, eta mundu islamiarreko tenplu handien keinuak biltzen ditu. Mihrabak, Mekarako norabidea adierazten duenak, Kordobako Meskitakoa erreproduzitzen du; koloretako marmolezko panelak Jerusalemgo Al Aqsakoen berdin-berdinak dira, eta qiblako leiho zabalek Istanbulgo Meskita Urdinekoak kopiatzen dituzte. Eskuz landutako Atlaseko zedrozko panelek Koranaren aleia bat jasotzen dute, jainkoaren atributuak aipatzen dituena; sarrerako patioko iturria eta mosaikoak, berriz, Fezeko artisauen lana dira, duela mila urteko Granada musulmaneko diseinu eta teknikei leial.

Kanpotik, minaretea nabarmentzen da, Albaicinen oso berezkoak diren proportzio eta silueta dituen dorrea. Teilatu-hegalaren azpian, kaligrafia kufikoan idatzitako inskripzio batek fede musulmanaren aitorpena jasotzen du.

Ikasketa Islamikoen Zentroak osatzen du bisita: arabieraz, gaztelaniaz eta ingelesez idatzitako testuen eta ikus-entzunezko materialen liburutegi bat, 140 lagunentzako hitzaldi-areto bat eta erakusketa-areto bat ditu. Hitzaldiak, arabiera-eskolak eta Espainiako ondare islamiarrari buruzko ikastaroak antolatzen ditu, eta beheko solairuan, harreraren ondoan, liburu, artisautza eta oroigarri denda bat dago.