Fornalutx

Fornalutx edo Fornaluig (katalanez ofizialki: Fornalutx) Espainiako udalerri eta herri bat da, Mallorcaren mendebaldean dagoena, Balear Uharteetako autonomia erkidegoan. Mediterraneo itsasoaren ertzean, udalerri honek Sóller eta Escorcarekin egiten du muga.

Herriaren paisaiaren edertasunari esker, Espainiako herririk ederrenen elkartearen (Los pueblos más bonitos de España) kide da.

Herriaren historia beti egon da lotuta Sóller herri aldamenekoarenarekin, biek udal-barruti bakarra osatu baitzuten lehen aldiz 1812ra arte eta bigarrenez 1820ra arte. 1837an izan zen hirugarren eta behin betiko aldia. Udalerri independente gisa zituen eskubide konstituzionalak aitortu zitzaizkion. Fornalutxeko lehen alkatea Antonio Mayol Arbona (Xoroi) izan zen, Bàlitxeko Mayoltarren leinukoa; 1812ko azaroaren 1ean izendatu zuten, eta hurrengo urtean Lluc Bisbalek hartu zuen haren lekukoa.

1983an, «Mallorcako Turismoa Sustatzeko Zilarrezko Plaka, Hiribildua Defendatu eta Zaintzeagatik» eman zioten, eta urte berean Turismoko Idazkaritza Nagusiaren «Espainiako Herri Edertu eta Zainduen II. Sari Nazionala» jaso zuen; 1995ean, «Premi Alzina» (Arte Saria) eman zioten naturaren alde egindako lanagatik, Ornitologiaren eta Naturaren Defentsarako Balear Taldeak urtero ematen duen saria.